انتقد الإعلامي أحمد شوبير، على استمرار هاني سعيد المدير الرياضي لنادي بيراميدز، فى الهجوم وذلك بسبب عدم تأجل مباراة سيراميكا فى بطولة الدوري المصري.
وقال شوبير خلال برنامجه الإذاعي:" هاني سعيد المدير الرياضي لنادي بيراميدز، خرج من تانيه وهاجم الناس اللي عملوا معاه مداخلة بعد مباراة الفريق مع صن داونز".
وتابع شوبير قائلاً:" أنا عايز أفهم حاجة هو احنا " ملطشة ولا إيه"، حضرتك غلطت لما قفلت السكة فى وش مذيع قناة" اون سبورتس"، هو بدل ما يعتذر بيقول إن القناة قاصدة".
وأضاف شوبير قائلاً: " أنا بتكلم فى أصول ومحدش بيتكلم عن الموضوع ده، وفي الآخر أنا اللي هطلع غلطان وهيتعمل فيه مذكرة، ياراجل اعتذر بسبب اللي عملتوا".
وانفعل هاني السعيد، على مذيع الاستديو التحليلي، في مداخلة بعد المباراة، وقام بغلق الهاتف في وجهه، اعتراضًا على مقاطعته الحديث عن مباراة الفريق مع سيراميكا كليوباترا.
وقال أحمد شوبير ، في تصريحات إذاعية: "أتعجب من تصرف هاني سعيد بالأمس مع مذيع أون سبورت، يعني الراجل يا كابتن هاني بيكلمك بعد الماتش يباركلك وفرحان تقوم تقفل السكة في وشه؟!".
وتابع: "طب ليه يا ابني هو لا بيشتغل عندك ولا ليك عنده حاجة، والراجل مغلطش في حقك ولا في حق ناديك، يبقى ليه تقفل السكة في وشه، مالك يا كابتن هاني في إيه".
وأضاف: "أنا بس عايز أسأل حضراتكم لو أنا كنت مكان المذيع وقفلت السكة في وش الضيف كان إيه اللي هيحصل، تحويلي إلى المجلس الأعلى للإعلام، قرار بإيقافي من المجلس الأعلى للإعلام، منتهى الاستهانة، منتهى المهانة، وكان طبق عليا القرار فورا من تاني يوم".
واختتم: “هل حد بيطلع يعتذرلنا، هي القناة ملهاش حق، هو أحنا ملناش حقوق، زي ما علينا المفروض يكون لينا، وأنا بطالب المجلس الأعلى للإعلام بالتدخل، أنا عايز حقي”.
