اخبار السياسه سلوى بكر: كلنا موحدين.. بس ليه تشغلوا نصف ساعة قرآن قبل وبعد الأذان؟

قالت الروائية سلوى بكر، إنّها لا تعترض على قراءة القرآن في المساجد أو غيرها، موضحةً: «كلنا مسملين وموحدين بالله، ونقرأ القرآن، لكن الاعتراض هو أن يُفرض على الناس الميكروفونات بواسطة من يمتلكونها، فلا مشكلة في الأذان، ليه تعملي نصف ساعة قرآن قبل الآذان، ونصف ساعة قرآن بعد الأذان».

سلوى بكر تكشف رؤيتها لاختيار المؤذن

أضافت سلوى بكر، في مداخلة هاتفية مع تليفزيون الوطن، أنّ النبي اختار من كان له صوتا جميلا، لكي يؤذن ويلبي الناس الدعوة للصلاة: «لكن أنا بيطلع لي صوت البواب في العمارة اللي جنبي، وبتاع الفراخ اللي هو بقى شيخ، لمجرد إنه ربى لحيته، صوته قبيح، ولا يصلح لدعوة الناس إلى الصلاة بالأذان».

وتابعت الروائية: «الإرهاب مش إني أشيل سلاح وأهدد به الآخرين، لكنه يتمثل في أشياء كثيرة، وهو أنك طول الوقت تقولي اعمل كده ومتعملش كده، واشرب من دي ومتشربش من دي، زي عشرات التفاصيل اللي طالع علينا عشرات الدعاة في كل لحظة وكل وقت يقولوها لنا، نحن في حاجة إلى تعدد الخطابات، والبنات في الإعدادي، أي سن الطفولة، يتحجبوا ليه؟».

سلوى بكر: الحجاب مظهر شكلي للتدين

أوضحت سلوى بكر: «شفنا المدرسات اللي بيزعقوا للطالبات وبيعنفوهن، عشان مش لابسين حجاب، مين اللي قال كده؟ إحنا قبل هذه المظاهر الشكلانية للتدين مكناش مسلمين؟ كنا بنروح المدرسة بجيبة قصيرة في جيلي، وكنا بنلعب في حصة الألعاب، وندرس الموسيقى ونقرأ الكتب، مكناش مسلمين؟ كنا مسلمين وموحدين بالله، فجأة لو ملبسناش حجاب منبقاش مسلمين؟ محدش قال كده؟».