اخبار السياسه أديب عن تلويث «العزيزية»: زبالة مصانع ومطاعم مش بيوت.. هنروح في داهية

استنكر الإعلامي عمرو أديب، تلويث ترعة العزيزية بمحافظة الجيزة بعدما قامت الدولة المصرية بتبطينها، قائلًا: «الزبالة دي مش زبالة بيت، دي زبالة مصانع ومطاعم، نوع الزبالة قماشاته كبيرة، دي مش بقايا منازل، دي مصانع بتصب، ومطاعم بتصب، وورش بتصب، وزيت عربيات، هنروح في 60 داهية، ويلم حشرات وأمراض».

وأضاف أديب، خلال تقديم حلقة اليوم من برنامج «الحكاية»، الذي يعرض عبر شاشة «MBC مصر»: «مهما شيلنا القمامة مش هينفع، لكن اللي هينفع إننا نراعي ربنا في نفسنا، وبعدين نقول فيه ناموس في شارع الهرم، ده المفروض يبقى في سحالي وثعابين وعقارب.. ده انتو هيطلع لكم تنين وتماسيح وثعابين، ربنا ميرضاش بكده».

وتابع الإعلامي عمرو أديب: «دي فلوس بتترمي في الأرض، في مصر هي تاريخ من الهدر.. هدر أموال وجهد وتعب، أتمنى من المحافظين والمسؤولين عن القمامة في هذه المناطق زيادة صناديق القمامة، لأنه سيكون مجهود أقل من إزالة القمامة من الترع».

وحول تلويث الترع بعد تبطينها، قال أديب: «إحنا عاملين زي اللي شايل شوال مخروم، قاعدين نعبي وبيقع من الناحية التانية، ده انتحار جماعي، ولما نقول مخالفة يتقال أنا بكسب كام! .. وتقديري إن الموضوع ده مش هيتحل».

وواصل: «كيف تصل الترعة إلى مرحلة الانسداد الذي يمكن أن نسميه بالانسداد المعوي دون أن يلاحظها أي مواطن او مسؤول.. ده لو إنسان كان مات، مش هقول تضحية، ملكش دعوة بالتضحية، ده إنت مش عاوز تشيل الزبالة، إحنا بنبهدل البلد».