اخبار السياسه كوفيّة

الجو خلاص بقى بيشتّي..

وأنا يومي بيبدأ من بالليل..

أنا عايش فيه بدماغ مساطيل..

ودماغي وكالة بدون بواب..

دوشة وكراكيب تضرب تقلب..

الجو خلاص بقى بيشتّي

وأنا عايزك نشرب سوا سحلب..

دي صوابعي من البرد بتكتب..

بخطوط مهزوزة ونكش فراخ..

لو ينفع فيكي الاستنساخ..

أنا كنت عملتك ١٠٠ مرة..

مكتوب على قلبي في خانة الحب

مختارك بإرادتي الحرة..

الجو خلاص بقى بيشتّي..

وأنا أصلي يوماتي ببات بره..

فأنا عايز حبك يبقى البيت..

يحضني بلهفة وشوق لو جيت..

لو طال الحضن شوية ياريت..

فأنا روحي أكيد متدفية..

لو تلمع عينك بتنوّر..

قدامي الدنيا المطفية..

الجو خلاص بقى بيشتّي..

وأنا ميت مليون إحساس فيا..

ومفيش إحساس فيهم أجمل..

من إني أتونس بعيونك..

وتلفي على رقبتي كوفيّة..