اخبار السياسه 7 أعداء و3 حبايب.. ردود أفعال ريهام سعيد على صور المشاهير بشيخ الحارة

«عدو ولا حبيب».. تُعد فقرة من ضمن برنامج «شيخ الحارة والجريئة»، الذي تقدمه المخرجة إيناس الدغيدي، على شاشة «القاهرة والناس»، الذي يُظهر أعداء الضيف وأحبائه، وكانت ضيفة اليوم الإعلامية ريهام سعيد، التي أعربت عن أن الفنانة ريم البارودي «بالنسبة لها مش موجودة، أنا اتنازلت عن البلاغ المقدم ضدها في الدنيا، بس مش مسامحة في حقي».

وعن الفنانة إنجي وجدان، «عدو»، فذكرت ريهام سعيد أن هذه الفنانة، تسببت في قطع رزقها، وساهمت في جلوسها عام في البيت، بسبب حلقة السمنة بسبب جهلها، «أنا قعدت سنين أدور على أطباء يعملوا عمليات سمنة مجانًا، وأدور على معدات لعلاج السمنة مجانًا».

وعن الفنان محمد رشاد، «عدو»، فذكرت أنها سمعت من طليقته مي حلمي، أن رشاد «قال عليا كلام وحش أوي، كلام قليل الأدب، هو ميعرفنيش أصلا، لو فعلا قال الكلام ده يبقى عدو طبعا، أنا اللي قولته عليه أنه مش مشهور، وفعلا مش مشهور وأنا معرفوهش، ومش بحترم خالص واحد يتكلم عن مراته على الهواء بالشكل اللي هو اتكلم عليها ده».

وعن مغني المهرجانات «حسن شاكوش»، «عدو»، أنها لا تُحبه على المستوى الشخصي، بينما على المستوى الفني فهو لا يقدم شيء، «طلبته مرة ييجي يعمل حفلة في الساحل عشان ولادي كانوا لسه راجعين من لندن، وهما زي الأجانب عاوزين يشوفوا حسن شاكوش، كلمته اداني رقم كبير أوي أوي، عشان يرضى ييجي، قولتله لا هديك فلوس بس بالطريقة المبالغ فيها دي».

وتابعت: «طلع عيني عشان ييجي، بعد ما جه كان فيه زحمة، قولتله انزل على رجلك اتمشي الحته دي، مدير أعماله قالي شاكوش ميمشيش على رجله وسط الناس، أديته للي فيه القسمه وقولتله طب أمشي، وأنا أقوله دول عيالي هيتأثروا لو مغنتش، ومدير أعماله يقولي شاكوش مينزلش».

وعن الإعلامية منى عراقي، ردت «كانت عاملة لايف بتشتم فيه من أربعة أسابيع، وقالت لي من أسبوع كل سنة وأنتي طيبة، وغيري صورة الواتس عشان شعرك مش حلو، ربنا يهديها».

وعن ياسمين الخطيب، قالت: «إحنا شغالين في قناة واحدة بس مش بنشوف بعض، ومش بتسلم عليا، أنا أعرف أن فيه واحدة اسمها ياسمين الخطيب، بس معرفهاش شخصيا، ولما هما سألوها مين الأفضل منى عراقي ولا ريهام سعيد قالت منى عراقي».

وعن الإعلامية لميس الحديدي، قالت «دي حبيبتي، دي أولا على مستوى الشخصي زي المهني إنسانة جدا، وعندها قبول في كل حاجة، بحب النجاح والشطارة بتاعتها، هي سياسة غول واقتصاد غول، ما شاء الله عليها».

وعن الفنانة أحلام، قالت «بحبها جدا، من الناس اللي تحسي أنهم طيبين وحقانين جدا، مش بعرفها شخصيا، بس بموت فيها، وبموت في تركيبتها، حالة قوية وشخصيتها قوية».

وعن الفنانة وفاء عامر، «أنا زعلانة منها، هي صاحبة ريم البارودي، وريم بتعتبرها أختها الكبيرة، تواصلت مع وفاء عامر عشان المفروض تقول لريم عيب، وكلمت وفاء شخصيا وشرحت لها الموضوع، لاقيت وفاء أخذت في صف ريم، وبعدت عني ومبقتش تكلمني».

وعن الكاتب الصحفي مكرم محمد أحمد، «ده توفى الله يرحمه، ده حبيب، ربنا يرحمه ويغفر له، اتوففت سنة في عهده، بس هو اللي طلع قال سنة كتير، قال سنة مبالغ فيها».