اخبار السياسه عمرو أديب عن الزحام بالحسين: الهند ابتدت كده.. اهمدوا شوية في عرضكم

انفعل الإعلامي عمرو أديب، على الهواء بسبب مقطع فيديو تداوله رواد مواقع التواصل الاجتماعي لزحام شديد في منطقة الحسين، موضحًا: «شارع المعز جميل والأوبرا المصرية جميلة، وكله شغال، بس بأمارة إيه؟! الناس بتقول هنفطر ونتسحر في مركب أصله في الهواء؟! أنت راكب المحروسة؟! أو اليخت الملكي؟! كلها حاجة مترين في مترين».

وأضاف أديب خلال حلقة الجمعة من برنامج «الحكاية» الذي يعرض عبر منصة «شاهد» في شهر رمضان: «ربنا يستر في اليومين الجايين، الناس تاخد بالها من بعضها، هل ده منظر بلد في عصر الكورونا، الناس مش عارفة تتنفس في وش بعض».

وواصل أديب تعليقه على مقطع الفيديو، قائلا: «طب وبعدين؟! الناس مش بتحس بالكورونا غير لما يجيلها أو يموت لها حد، وكل الناس اللي قاعد بتتندر وسط ناس، ولسه بتكلم مع حد متعلم من أيام كان بيقول إنه سامع إن الأزمة خلاص».

وحذر أديب من السيناريو الهندي، موضحًا أنها طلبت الحصول على عقار ريمديسيفير، بالرغم من أنها قاعدة الدواء في العالم: «قالت إن مصر والإمارات وربنا واقفين جنبها، رغم إن الناس كانت بتتريق على إننا بنصنع ريمديسفير، والهند طلبت كميات».

وواصل: «الهند وصلت للي وصلت له بسبب احتفالات دينية في الخلاء، كانت في الهواء الطلق، يا خلق الله ربنا ساترها معانا حتى الآن اهمدوا شوية، أنا في عرضكم، الوضع صعب وفي تحورات وأنواع جديدة».

وانتقد الإعلامي عمرو أديب قلة اقبال المواطنين على لقاح كورونا مع عدم الالتزام بالإجراءات الاحترازية، قائلا: «لازم نترزع في الحيط؟! إحنا مش عاوزين البلد تقفل، ومش عاوزين نوصل لأي مرحلة صعبة، اتوسل إليكم بشويش اليومين الجايين، محدش هيقدر يمنعكم تخرجوا وشايف الطوابير على العين السخنة والإسكندرية».