اخبار السياسه عمرو أديب عن جولة وزير النقل بالمنيا: العمال بيفاصلوه في نص ساعة شغل

قال الإعلامي عمرو أديب، إن ثقافة العمل يجب أن تتحسن كثيرًا لدى المواطنين، وذلك خلال تعليقه على تفقد المهندس كامل الوزير وزير النقل والمواصلات لورش السكك الحديدية في محافظة المنيا، موضحًا: «الوزراء في مصر بيعملوا حاجات مش بتتعمل في العالم، الوزير في العالم بيبقوا مسؤولين عن سياسات وفي الغالب مش بينزل يجرب كرسي القطر، لكن وزير النقل كامل الوزير قرر إجراء جولة في المنيا ومتابعة الورش والسكك الحديدية، استرعى انتباهه أمرين، الأول مشهور في مصر، سأل الناس فين، اتقاله بيصلوا».

وعرض عمرو أديب خلال تقديمه برنامج «الحكاية»، الذي يعرض عبر شاشة «MBC مصر»، مقطع فيديو لنقاش دار بين وزير النقل وأحد العمال حول عدد ساعات العمل، إذ فوجئ بعدم وجود عدد من العمال بسبب الصلاة: «لسه بنتكلم هنشتغل 7 أو 8 ساعات، الوزير بيقولهم شغلكم الساعة 7 يقولوا لأ 7:30 أو 8، إحنا بنفاصل، بقينا مضطرين في مصر إن الوزير ينزل يشوف العمال ولا لأ ويشوف الكراسي، وقالهم الناس ظهرها وجعتها، وناقص يحط الكرسي بايده، ولازم ننتقل لمرحلة في مصر إن الناس تعمل شغلها لوحدها».

وتابع: «وهو ماشي شاف لودر بملايين وبيسألهم بتعملوا بيها إيه، وطلب من أحد العامل إنه يدوره، بالرغم من أنها في صميم العمل اليومي، ومش ممكن كل وزير يعمل كل ده، لازم يبقى في هيراركية، وهنعمل إيه بعد ما يمشي من المكان، الوزير خايف على اللودر زي ما يكون خايف على عيل من عياله».

وحول تحايل بعض العمال في ساعات العمل، أوضح الإعلامي: «اللي يقول على قد فلوسكم ميشتغلهاش يسيب حد تاني يشتغلها، محتاجين نهضة إدارية وفكرية في موضوع الشغل ده، لازم يبقى في ثواب وعقاب، واللي يشتغل ياخد فلوس كتير واللي ميشتغلش فلوس أقل».