أخبار عاجلة

اخبار السياسه "شوقي" ينقل شرح مدرس رياضيات لنتيجة "تانية ثانوي" بطريقة مبسطة

"شوقي" ينقل شرح مدرس رياضيات لنتيجة "تانية ثانوي" بطريقة مبسطة

نشر الدكتور طارق شوقي وزير التربية والتعليم والتعليم الفني، رسالة من معلم الرياضيات المصري محمد منير، والذي يعمل مدرسا بمدارس المتفوقين في العلوم والتكنولوجيا STEM لشرح طريقة التقييم الجديدة وذلك عبر حساب الوزير الشخصي على موقع التواصل الاجتماعي "فيسبوك".

وقال شوقي: "كما ترون فإن مصر زاخرة بطلاب نابهين مثل الآلاف الذين حققوا نتائج ممتازة بعد 8 شهور فقط من انتقالهم للنظام الجديد وزاخرة أيضا بمعلمين أصحاب علم ورسالة معًا".

وأما عن شرح منير فكان كالتالي:

شرح نتيجة الصف الثاني....محدش فاهمها خالص نتيجة الصف الثاني السنة ده.. وبما أني مدرس رياضيات لازم يكون لي دور واضح في تفسير النتائج ده....طبعا كل الطلاب وبعض المدرسين علشان مش فاهمين حاجة فقاعدين ينقضوا نظام التعليم الجديد.. ولكني كمدرس رياضيات فخور جدا بعرض النتيجة بهذه الطريقة الجميلة و الدقيقة ... تعالى نبدأ ونعرف يعني إيه درجات التقييم الجديد اللي محدش فهمها!!".

وأضاف: "ببساطة لو انت جبت في الكيمياء 90 من 100 وفي الرياضيات 80 من 100... انت كده أشطر في أي مادة منهما؟! ... الفهم الخاطئ والسائد عند الجميع هيقول انت أشطر في الكيمياء.. الكلام ده مش صحيح دائما... لأن ممكن تكون جايب في الرياضيات 80 من 100 وانت الأول على المدرسة في الرياضيات لأن الامتحان كان صعب أو طويل والوقت كان غير كافي.. وفي المقابل إن انت كنت الأخير على المدرسة في الكيمياء لأن امتحان الكيمياء كان جاي من الكتاب بالنص وكان سهل جدا فكل الطلاب قفلوا الامتحان ...هنا أنت أشطر في الرياضيات لأنك الأول على الدفعة بالرغم من إنك جايب 80 من 100 فقط".

وتابع: "من جهة أخرى عندك التنسيق بيعتمد على درجتك أم بيعتمد على ترتيبك؟! .. الوزارة بتريح الطالب وتعطي له الدرجات في المادة لكن التنسيق بيعتمد على ترتيبك مش على درجتك... مثلا لو الأول على الجمهورية جايب 80% فكلية طب هتأخذ من 80%... علشان كده.. لو عايز تعرف درجتك الحقيقية لازم تعرف ترتيبك مش درجتك !!... علشان كده في الإحصاء في مفهوم اسمه Percentile ده عبارة عن نسبة مئوية من 100 تعطي درجة ترتيب.. مثال لو هناك 1000 طالب وإنت الأول هتكون درجتك 100.. ولو كنت العاشر هتكون جايب 99.. ولو كان ترتيب الـ400 هتكون جايب 60.. ولو كان ترتيبك الـ700 هتكون جايب 30 ولو كنت الأخير هتكون جايب صفر.. ده مش معناه انت ناجح أم راسب ممكن تكون الأخير وانت درجتك في المادة 95 من 100".

واستطرد: "طبعا النظام الجديد مينفعش نستخدم فيه طريقة الدرجات القديمة لأن الامتحان فيه أفكار ومش كل الطلاب هيقفلوا الامتحان زي زمان.. علشان كده أنا شخصيا فخور جدا إن فيه حد فاهم إحصاء بيعطي للطلاب نتيجة حقيقية لهم... هل نظام الترتيب ده اختراع مصري مثلا؟!.. للأسف لا !! .. ده فيه امتحانات دولية كثير بتتبع الترتيب من الدرجات زي مثلا امتحان GRE ده امتحان بيعادل بكالوريوس في الفيزياء أو الرياضيات".

وأضاف: "المهم تدخل الامتحان تدعي و تقول (يا رب غيري ميعرفش يحل) مع إن العادي إنت تدعي وتقول (يا رب أعرف أحل) لأن الامتحان بيعتمد على الترتيب... فمش مهم تجيب كام أهم حاجة ترتيبك الكام ؟!!....ناس بتسأل إنها ترتبها قل أو زاد فعلا ممكن ده يحصل.. لأننا اتفقنا إنها مش درجة.. لو مثلا واحد عمل تظلم وزاد درجتان مثلا فكده الترتيب لباقي الطلاب هيتغير ونرجع تاني نقول إن بنظام الدرجات القديمة لو كنت جايب 80 من 100 وعملت تظلم وبقيت 82 من 100 هيكون درجات باقي الطلاب زي ما هي لكن إحنا بنتكلم على ترتيب".

وأشار: "دلوقتي ممكن نوضح المفهوم للنتيجة ده من ناحية رياضيات

أولا:- نظام الألوان ده نظام زي نظام التقديرات تماما.. تخيل اللون الأزرق يعنى امتياز (مثلا من 85% إلى 100%) واللون الأخضر جيد جدا (مثلا من 70% إلى 85%) واللون الأصفر جيد (مثلا من 50% إلى 70%) واللون الأبيض ضعيف أو راسب أقل من 50% من درجة المادة.. وهأكد تاني أن الرقم تحت العمود (ارتفاع النقطة السوداء في العمود) ده مش درجتك في المادة ده ترتيبك يعني لو كانت النقطة السوداء في الأصفر والرقم تحت العمود 37 مثلا فأنت كده ناجح لكن ترتيبك الـ63 من 100 من الطلاب، هتشوف النقطة السوداء موجودة في إني للون وتعرف تقديرك.. هي ده الدرجة بنظام القديم خلاص انت كده عرفتها... طبعا ده مش اختراع مصري يعني... ده طريقة تقييم كل مدارس العالم.. بس الفرق إنهم بيعملوها حروف A,B,C,F.

ثانيا:- كانت النتيجة المعلنة سابقا قبل ترتيبك بدون ما تعرف درجتك (قولنا ده مش الدرجة ده Percentile وبتدل على ترتيبك) ومعناها كل ما النقطة السوداء تكون أعلى كل ما يكون ترتيب مع الأوائل.. لو النقطة السوداء موجودة أعلى العمود تعرف إنك الأول على الجمهورية ولو موجودة في قاع العمود تعرف إنك أفشل طالب على مستوى الجمهورية.. اتفقنا كل ما الرقم ده يزيد أو ما يقابلها كل ما النقطة السوداء تكون أعلى كل ما تكون متفوقك أكثر.

ثالثا:- إيه المتوسط على الجمهورية ده .. تخيل كده إننا جمعنا كل درجات الطلاب في المادة الواحدة وحسبنا لهم المتوسط مثلا كان 80 من 100 فالمتوسط ده بيسمى متوسط حسابي وهو قيمة إحصائية مهمة جدا علشان تعرف مستواك.. لو المتوسط ده كان مثلا 80 من 100 فده هيأخذ لون أخضر وله ترتيب Percentile مثلا 60 زي اللغة العربية فلو انت كطالب فوق المتوسط هتبقى طالب متميز أو لو انت عند المتوسط هتكون طالب عادي أو لو أقل من المتوسط يبقى انت طالب محتاج تحسن نفسك.

وتابع: "حاجة مهمة في الإحصاء اسمها الوسيط الطالب قاعد يدرس فيها طول عمره وفي الحقيقة الوسيط ده يعادل ترتيب 50Percentile يعني الطالب اللي فوق الـ50 ده طالب في المتوسط والطالب الأقل من 50 ده طالب تحت المتوسط... أو بطريقة أخرى لو النقطة السوداء فوق منتصف العمود هيكون مستواك فوق المتوسط ولو أسفل منتصف العمود هيكون مستواك تحت المتوسط".

واختتم منشوره: "كده أعتقد إني وضحت لكم معنى الدرجات بالنظام الجديد.. وأتمنى إن التعديل بكرة يكون للأفضل وليس برجوع لطريقة الحساب القديمة.. ومع إن Percentile لا تدرس في المدارس المصرية ولا تدرس حتى في بعض الجامعات.. إلا أنها طريقة دقيقة لمعرفة مستوى الطالب الحقيقي".

جميع الحقوق محفوظة لمصدر الخبر الوطن وتحت مسؤليتة ونرجوا متابعتنا بأستمرار لمعرفة أخر الأخبار علي مدار الساعة مع تحيات موقع موجز نيوز الأخباري

اشترك فى النشرة البريدية لتحصل على اهم الاخبار بمجرد نشرها

تابعنا على مواقع التواصل الاجتماعى

السابق اخبار السياسه وزير التعليم: 10%من طلاب 2 ثانوي حاولوا يغشوا بذكاء.. عارفينهم بالاسم
التالى اخبار السياسه لأطباء الأسنان.. اعرف شروط وكيفية تسجيل وفتح عيادة خاصة بك