اخبار السياسه ربي عيالك

ربي عيالك.. الجملة اللي قالها الراحل العظيم سعيد صالح في مسرحية العيال كبرت على سبيل الدعابة وأحنا بنرددها كل يوم تقريبًا هي واحدة من أهم الجمل اللي الناس محتاجة تعرف معناها.

مش معنى أنك بتصرف على ولادك وبتأكلهم أحسن أكل وبتلبسهم أحسن لبس يبقى كده أنت ربيت ولادك، ومش معنى أنك بتهتمي بصحة ولادك ونظافتهم وطول النهار بتزعقي وتضربي فيهم عشان يذاكروا ويجيبوا درجات كويسة يبقى أنتي كده ربتيهم كويس.

أكيد كل الحاجات اللي فاتت دي مهمة ما عدا الزعيق والضرب طبعًا لكن مش هي كل حاجة ومش هي أهم حاجة، بجانب الأكل والشرب والتعليم، ابنك أو بنتك محتاجين يبقى عندهم ثقة في نفسهم ومحتاجين يلعبوا رياضة أو يتعلموا مزيكا أو رسم، حتى لو ده عن طريق الإنترنت مثلًا، ومحتاجين أنك تشجعيهم إنهم يقرأوا كتير لأن ده هيحميهم لما يكبروا وهيخليهم يقدروا ياخدوا قرارات صح ويختاروا أصدقائهم صح.

ولادكم محتاجين يحلموا من غير ما تكسروا أحلامهم وتقولوا لهم "إيه الهبل اللي إنتوا بتعملوه ده؟ روحوا ذاكروا أحسن"، وعايزينكم تبقوا أصحابهم يقدروا يحكوا لكم هما بيعملوا إيه من غير ما يخافوا إن أنتوا هتزعقوا لهم أو هتحكوا أسرارهم لحد تاني.

الأمير وليام لما ابنه جورج بيكلمه بينزل يقعد على الأرض عشان يسمعه، وبدأ يعمل كده بعد ما عرف من علماء النفس إن ده مفيد للطفل لأنه بيخليه يحس أنه مهم وأن أبوه بيحترمه فالولد بيكبر وبيبقى واثق من نفسه.

هنري فورد اللي اخترع السيارة كان وهو طفل ما بيعرفش ينام بسبب صوت العربيات العالي جدًا والمزعج، فوالدته سألته في مرة إيه سبب قلة نومه فحكى لها وطبعًا الأم ما قالتلوش أنت بتدلع ويلا نام وأنت ساكت لكن قالت له طب ايه رأيك نحاول نفكر في حاجة تخلي العربيات مالهاش صوت أو صوتها يكون خفيف فبدأت دماغه تشتغل ويفكر.

إيجور سيكورسكي اللي اخترع الطائرة الهليكوبتر وهو صغير والدته خدته يزور متحف ووقفت قدام لوحة لدافنشي وشورت له على رسم لدافنشي وقالت له أن ده مشروع طائرة ترتفع عموديًا وأن دي فكرة رائعة.

أسطورة السباحة مايكل فيلبس كانوا المدرسين بيقولوا لوالدته إنه فاشل ومش هيعمل حاجة في حياته لأن فيلبس كان عنده مرض اسمه الحركة الزائدة بيخليه يتحرك كتير ومايقدرش يقعد لفترة طويلة، لكن والدة فيلبس كانت دايمًا بتقول له إنه إنسان رائع وبدأت تخليه يستفيد من مرضه بأنه يمارس رياضة يطلع فيها طاقته الزايدة عن الحد وفعلًا فيلبس بقى أفضل رياضة أولمبي في التاريخ بفضل كلمات أمه البسيطة.

باختصار الأب والأم هما اللي في أيديهم يخلوا ولادهم يبقى ليهم قيمة في الحياة أو يبقوا مجرد بني آدمين عايشين وخلاص.