#اليوم السابع - #فن - هشام نزيه: حفل المومياوات مش أصعب شىء ولكنه أهم عمل فى حياتى ومسيرتى

حل الموسيقار هشام نزيه، ضيفا في برنامج "كلمة أخيرة" للإعلامية لميس الحديدى، المذاع على قناة ON، وتحدث عن حفل المومياوات قائلا: "لم يكن أصعب شيء ولكنه أهم عمل في حياتى ومسيرتى، ولم أشعر بصعوبة لأن كل حاجة كانت خارجة بشكل طبيعى، وأنا لما بألف مزيكا بكون قاعد لوحدى".

وأضاف: "فكرة مزيكا حفل المومياوت بدأت صغيرة جدا وبدأت تكبر واحدة واحدة، ويمكن الشغل بتفكيره أخد سنة تقريبا وكل شوية أغير الفكرة وأطورها، ولكن الوقت الفعلى لخروج المزيكا أخدت 3 شهور، وانا لحنت المقطع قبل ما يتعمل كلام لها، ومكنتش أعرف انها هتكون بالهيروغليفى".

وتابع نزيه: "لما عملت مزيكا حفل المومياوات كل اللى في بالى مصر بكل تفاصيلها أعملها في الـ8 دقائق بتوع المزيكا اللى عملتها، وبالنسبة لأغنية مصر لم تنم، كنت فرحان اننا وصلنا للمرحلة دى واننا بنفتتح متحف، بعد أزمات كتير وبقى في انفراجة ورا انفرجة حتى جاء هذا اليوم بافتتاح المتحف الكبير، وكنت فرحان جدا".

واختتم نزيه: "مكنتش متوقع إن الترنيمة دى تعلق مع الناس، وأنا عمرى ما شكّيت في ذوق الناس أبدا، والمهرجانات الشعبية مش بتضايقنى أنا بس أتمنى يطوروا من المزيكا شوية وهيعملوه لوحدهم، لكن حلو ان الناس تسمع كل أنواع المزيكا والأغانى، المزيج ده كله يفرحنا".